Laxita Sandila: Papa taxi driver, arthik tangi se baad bhi nahi maani haari, ab beti ne videsh mein lehraya tiranga.
Laxita Sandila ne jeeta India ke liye gold Medal:
Bharat ki Laxita Sandila ne Dakshin Korea mein Asian Under-20 Athletics Championship mein desh ke liye gold medal jeeta. Mahilaon ki 1500 meter daud mein 4:24.23 second ka vyaktigat sarvashreshth samay nikalte hue woh pehle sthan par rahi. Lekin taxi driver ki beti ke liye yahaan tak pahunchne ka safar aasaan nahi tha.
18 saal ki Laxita Sandila pehli baar pichle saal tab charcha mein aayi theen, jab unhone France mein ISF World School Gymnasiyad mein do silver medal jeete the. Budhwar ko is middle distance runner ne Dakshin Korea mein Asian Under-20 Athletics Championship mein 1500 meter mein gold padak jeetkar athletics ki duniya mein ek aur bada kadam badha diya hai. Taxi driver Vinod ki beti Laxit Vadodara ki rehne waali hain.
Unhone apne sapne ko track par rakhne ke liye arthik tangi ka samna kiya hai. Vinod ki aamdani mushkil se hi guzaara kar paati hain. Unke liye apni beti ki training ke liye fund jutaana badi chunauti rahi.
NGO aur coach ne ki Laxita ki madad
Kuchh mahine pahle Vinod ne humare saathi akhbaar Times of India se kaha tha, ‘Athletics mehenga hai kyunki Laxita ko training, behtar quality ke jute aur ek acche physio ki bhi zaroorat hai. Unke shaandaar pradarshan aur safal hone ki ichha ko dekhne ke baad kuchh NGO ne madad ke liye haath badhaya hai. Yahaan tak ki uske coach Rippandeep Randhawana ne Laxita ka kaafi support kiya.
Mata-pita ko kiya dhanyavaad
Laxita ne atma vishwaas ke saath start line se shuruat ki aur doosre sthan par kuchh second ke liye piche rahi thi, lekin jald hi woh anya ladki se age nikal gayi aur finish line par 4 minute aur 24.23 second mein pahunch gayi. Unhone apne pichhle vyaktigat sarvashreshth pradarshan 4:26.48 second ko do second se adhik ke antar peechhe chhoda diya.
Asian gold jeetne ke baad Laxita ne apne coach, mata-pita aur sabhi samarthakon ko dhanyavaad diya. Unke pita ne kaha – hamein us par bahut garv hai. Woh is tournament ke liye kadi mehnat kar rahi thi, isliye hamein vishwaas tha ki woh padak layegi.
PT Usha ko maanti hain aadarsh:
Laxita purv athlete PT Usha ko apna aadarsh maanti hai. Usne pehle ek interview mein bola tha – unke videos dekhkar hi maine bahut kuchh seekha. Mera sapna Olympics mein participate karna aur apne desh ke liye medal jeetna hai.
Us interview mein Laxita ne bola tha ki usne apni kishoraavastha mein hi athletics ke liye training shuru kar di thi. BB Academy ka student Laxita ne kaha, ‘Yeh tab shuru hua jab main 14 saal ki thi. Main shuru mein hockey khelti thi lekin mere ek rishtedar coach hain aur unhone hi sujhav diya ki main vyaktigat khel chunoon. Mujhe daudne mein maza aata hai, isliye yeh ek vikalp tha.’
Regards,
Team “Sarkarikhabrein“