Kya is hafte Ukraine ka bahut pratikshit jawaabi hamla shuru ho gaya hai? Russia ke rashtrapati Vladimir Putin to aisa hi soch rahe hain.
Shukravaar ko Telegram par prasarit ek video interview mein Putin ne kaha, “Hum nishchit roop se ye keh sakte hain ki Ukraine ka aakraman shuru ho gaya hai.
Ek tarah se, ye kai saptaah pahle hi shuru ho chuka hai. Ukraine aise abhiyaan chala raha hai jinhe sainya bhasha mein ‘shaping operation’ kaha jata hai.
Lambi doori ki missile aur topkhana ke zariye ho rahe is hamle mein front-line ke peeche se Ukraine Russia ke mahatvapurn hathiyaaron aur samaan ko nuksaan pahuncha raha hai.
Halaanki is somvaar ko ek bada badlaav bhi dikha. Dakshini Ukraine mein, Zaporizhia ke dakshin-poorv mein Ukraine ki halki hathiyaaron se lais chhoti tukdiyan maidano se hote hue Russia ki qilebandi ki taraf badhi.
Ukrainian security and co-operation center ke sah-sanshthaapak aur chairman Serhiy Kuzan ne BBC se kaha, “Ab samuche morche par ladai se pahle jankariyan jutaane ka abhiyaan chal raha hai. Iska matlab ye hai ki Russia ki raksha pankti ka jaayaza liya ja raha hai.”
Kuzan kehte hain, “Kai jagahon par nuksaan kam hota hai aur ye operation kaamyab hote hain. Jabki kai jagahon par roosi jawaabi hamla karte hain. Wahan ye itne kaamyab nahin hote.”
Halaanki Kuzan ne shahron ke naam nahin liye. Bas unhone itna bataya ki ye sabhi Zaporizhia ke dakshini ilaake mein hain.
Lekin mangalvaar ko Nova Kakhovka mein baandh ki barbaadi ne duniya ka dhyaan apni taraf kheench liya. Is baandh ke tootne se Nipro nadi ke donon taraf 230 varg kilometer ilaaka baadh mein gir gaya.
Ukraine ne Russia par baandh par hamla karne ke aarop lagaye lekin Russia ne inhein kharij kar diya. Russia ke khandan ke bavjood ise sirf sanyog nahin maana ja sakta hai.
Ye baandh aur iske paas ki sadak Ukraine ki sena ko Russia ke balon par hamla karne ke liye morcha banana ka mauka de sakti theen.
Ukraine morche ki is front line ke baare mein apne irade pehle hi zaahir kar chuka tha.
April mein Ukraine ke soldiers ne Neepro nadi ko paar karke Oleshki kasbe mein bridgehead (pul ke paas ke ilaake par niyant) sthapit kar liya tha. Ukraine ke Kherson ke paas ke delta mein bhi kai dweepo par niyantran kar liya tha.
Ukraine ki sainya yojana kya hai?
Ukraine is ilaake ko lekar kitni vyapak sainya yojana bana raha hai ye abhi spasht nahi hai. Lekin filhaal yahan aayi baadh ke baad nadi paar karna lagbhag asambhav ho jayega.
Kuzan kehte hain, “Lekin is disha se bhi Ukraine aage badh sakta hai, ise Russia ne dekh liya tha.”
Ek taraf jahan Ukraine ke adhikaari baadh ke baad ke haalaat ko niyantrit karne ki koshishon mein lage the, wahin doosri taraf ladai apni raftaar se jaari thi. Aisa pratit ho raha hai ki purv ki taraf ye aur tez ho rahi hai.
Guruvar subah Britain ke raksha mantralay ne tweet kiya, “Morche ke kai sectors mein bheeshan ladai chal rahi hai aur kai jagahon par Ukraine aakramak hai.”
Isi din jaari ek video mein Russia ke raksha mantri Sergei Shoigu ne ek bayan mein kaha ki Russia ke sainyabalon ne Zaporizhia ke dakshin mein Ukraine ka ek hamla naakaam kar diya. Is hamle mein 150 baktarband gadiyan aur 1500 sainik shaamil the.
Vaheen Russia ke raksha mantralay ne ek bayan jaari kar bataya ki Ukraine ki 47vi mechanized brigade ne Russi morchebandi ko todne ki koshish ki.
Internet par share kiye gaye ek video mein kuchh naya bhi dikhaya hai. Ismein pashchimi deshon se mila leopard tank barbaad hota dikh raha hai. Halanki is video ko swatantra roop se pushti nahi ho saki hai.
Ukraine ke adhikaariyon ne maujooda abhiyaan ko lekar chuppi saadh rakhi hai aur bahut nape-tule shabdon mein hi jaankari de rahe hain.
Ukraine ke deputy raksha mantri Haina Maliyar ne bataya ki Zaporizhia se 65 kilometer dakshin poorv mein Russia ke sainik rakshaatmak sthiti mein hain.
Telegram par jaari ek bayan mein unhone ye bhi kaha hai ki aage aur poorv mam mein Velyka Novosikla ilaake mein bhi ladai chal rahi hai.
Ye donon hi shehar ek morche ke is bhaari hathiyaaron ki maujoodgi waale hisse ko donon siron par hain jiske baare mein vishleshak maante hain ki Russia apna bada jawabi hamla yahan shuru kar sakta hai.
Kuzan kehte hain, “Ye koi raaz ki baat nahi hai ki Ukraine ka mukhya maksad dakshin mein dushman ki sena ke jamawarde se zameeni sampark ko kaatna hai.”
Donbas ilaake se chalne wale Russia samarthak Telegram channels par Ukraine ke taza kadamon par khoob charcha ho rahi hai. Bahut se log ise lekar nakaratmak baatein hi kar rahe the.
Ek samuh mein ek vyakti ne post kiya, “Ye wahan ja rahe hain jahan Rusi sainik unka intezaar kar rahe hain. Kya pagalpan hai.”
Bahut se logon ne Ukraine ki badhat ko to swikar kiya lekin ye sawal bhi uthaya ki ye badhat kis keemat par hasil ho rahi hai.
Isi samuh ke ek anya sadasya ne post kiya, “Main is kamyaabi ki keemat par sawal utha raha hoon. Kya unke paas Orikhiv se 44 kilometer dakshin mein Tokmak tak pahunchne ke liye paryapt sainyabal hain, Berdiansk aur Melitopol ki to baat hi chhod dijiye.”
Aur kahan chal rahi hai ladai?
Lekin ladai sirf isi ilaake mein nahi chal rahi hai.
Bakhmut shahar ke uttari aur dakshini ilaake ki video footage mein Ukraine ke sainyabal aage badhte dikh rahe hain. Ukraine yuddh ki sabse lambi aur khooni ladai yahi chal rahi hai.
Malyar ka kehna hai ki Ukraine ke bal kuchh ilaakon mein 200 se 1100 meter tak aage bade hain.
Ye Bakhmut shahar ko charon taraf se gherne aur usme maujood Rusi sainikon ko fansane ka prayas ho sakta hai.
Britain ke raksha mantralay ke mutabik ye bahut hi jatil sainya paristhiti hai.
Lekin kya iska matlab ye hai ki Ukraine ka jawabi hamla natakigya charan mein pahunch gaya hai?
Ukraine ki rashtriya suraksha aur defence parishad ke sachiv Oleksiy Danilof ne budhwar ko is vichar ko hanske huye kharij kar diya.
Unhone kaha, “Ye sach nahi hai. Jab hum jawabi hamla shuru karenge to sabko pata chal jayega. Sab ye dekhenge.”
Lekin kuchh to nishchit roop se badal gaya hai.
Serhiy Kuzan kehte hain, “Baatcheet yahi hai ki morcha antat: aage badh raha hai.” Unhone ye bhi kaha ki Ukraine ke commanders ke paas abhi bhi kai khule vikalp hain.
Lekin Ukraine ke samne kai badi chunautiyan bhi hain. Sabse ahem chunauti hai ladaku vimanon ki kami jo hawa se Ukraine ke sainyabalon ki madad kar saken
.Kuzan bolte hain, “Ye yahi wajah hai ki hum dheere-dheere aage badh rahe hain aur uske baad hum air defense system ko karib laayenge.”
Ek anya karka samay bhi hai. Ye aakraman paanch mahine se adhik nahi chal sakta hai. Iske baad barsaat hogi aur zameen daldali ho jayegi. Aisi sthiti mein sainya vahanon ke liye aage badhna mushkil ho jayega.
Agar Ukraine ke sainyabal Russia ki rekha ko paar karke Azov Sagar tak pahunchne mein kaamyab ho gaye to phir iske pashchim ki taraf Russia ke sainik kamzor sthiti mein aa jayenge. Wo phir sirf Crimea se pahunchne wali rasad par hi nirbhar ho jayenge.
Kuzan kehte hain ki iske baad bas Ukraine ko Russia se Crimea ko jodne wale karcha bridge ko barbaad karna hoga aur Crimea tak saman lane wale jahazon aur vimanon ko nishana banana hoga.
Wo kehte hain, “Ye ant hoga. Lekin iske bahut jald ho jane ki ummeed mat lagaiye. Ismein kai mahino ka samay lag sakta hai.”
Regards,
Team “Sarkarikhabrein“