Diabetes Patients in India:
Bharat ko madhumeh ki rajdhani yun hi nahi kaha jata, iski wajah ye hai ki India mein sabse zyada diabetes ke marij hain aur pichle kuch saalo mein inki tadaad tezi se badi hai, jo ek khatarnak sanket hain.
Madhumeh Risk In India: Aaj hum aap aur aapke parivaar ke aaspaas mandra rahe ek bahut bade khatre ke baare mein batane ja rahe hain.
Ye khatra kuch aur nahi, balki diabetes hai. Hamari kharab lifestyle aur khanpaan ki wajah se madhumeh ki bimari ghar-ghar pahunch rahi hai. Ye baat hum nahi kar rahe, ye kehna hai ki Indian Council of Medical Research yani ICMR ka, jiske taaz survey ke mutaabik Bharat mein diabetes ke kul marijon ki sankhya 10 crore ko bhi paar kar chuki hai. Yani Britain ki aabaadi se bhi 3 crore zyada.
Bharat mein UK ki aabaadi zyada diabetes ke patients:
United Kingdom ki kul aabaadi 7 crore hai, jabki Bharat mein diabetes yaani madhumeh ke marijon ki sankhya hi 10 crore se zyada ho chuke hain. Yani Bharat mein sugar ke marij apne aap mein ek desh ke baraabar ho chuke hain. Aap chaahein toh keh sakte hain ki Bharat mein diabetes ka kingdom taiyaar ho chuka hai.
Lagatar badh rahe hain aankade:
Iss se bhi daraane waala ankada ye hai ki diabetic marijon ki ye sankhya beete kuch waqt se lagatar tezi se badhi hai. ICMR ka survey batata hai ki Bharat mein beete 4 saalon mein hi diabetes ke marijon ki sankhya 44% tak badh gayi hai. Yahi nahi, aise log jinhein nikat bhavishya mein diabetes hone ka khatra hai unki tadaad aur bhi zyada hai, survey ke anusar Bharat mein takriban 13 crore 30 lakh marij aise hain, jo pre-diabetic hain aur jinhein aane waale samay mein diabetes hone ka poora khatra hai. Aashanka se zyada khatarnak ijaafa.
Aashanka se zyada khatarnak ijaafa:
Halanki pehle International Diabetes Federation ne saal 2019 mein anumaan lagaya tha ki varsh 2030 tak Bharat mein diabetes ke marijon ki sankhya 10 crore paar kar jayegi.
Lekin is daraavne ankade ko hum 7 saal pehle hi paar kar chuke hain aur aaj desh ki kareeb saadhe 11% aabaadi diabetic ho chuki hai. Ismein bhi 3 crore log woh hain, jo beete 4 saalon mein iska shikaar bane hain.
Ye ankade batate hain ki aaj hum vaakei mein diabetes state banne ki taraf badh rahe h.Aur iski capital hai tourism ke liye mashhoor shahar Goa. Bharat ke in rajyon mein diabetes ka kahar. Jis Goa mein aap ghoomne aur masti ke liye jaate hain, aaj usi Goa ki kul 26.4% abadi diabetic ho chuki hai.
Iske baad Puducherry ka number aata hai, jahan 26.3% log madhumeh ke mareez hain, isi tarah Kerala mein 25.5%, jabki Chandigarh mein 20.4% log madhumeh ke shikaar ho chuke hain. Desh ki rajdhani Delhi bhi is list mein zyada peeche nahin hai aur Delhi ki 17.8% abadi madhumeh ka shikaar hai.
Har 6 mein se ek Bharatiya ko diabetes. Aaj poori duniya ke 17% diabetic mareez Bharat se hain, yaani har 6 mein se average ek mareez Bharatiya hai. Yahi nahin, is bimari ki wajah se jaan ganvane waalon ki sankhya bhi kam nahin hai, aur IDF Diabetes Atlas ke mutabik saal 2021 mein is bimari ki wajah se kul 6,47,831 logon ne apni jaan ganvayi thi.
Kya tala jaa sakta hai khatra?
Ab aap soch rahe honge ki kya ye khatra tala nahin jaa sakta hai? Bilkul tala jaa sakta hai, darasal diabetes ko pehle genetic yaani mata-pita se virasat mein milne waali bimari maana jaata tha, lekin aaj Bharat mein diabetes ke zyadatar mareez wo hain, jo kharab lifestyle ki wajah se iska shikaar hue hain… Ise Type 2 diabetes kaha jaata hai, aur agar ye log apni lifestyle mein thoda sa sudhaar kar lein, toh wo is meethi bimari se khud ko bacha sakte hain.
Aur aap khud ko aur apne parivaar ko diabetes ke khatre se bacha saken, iske liye humne aaj ek video vishleshan taiyaar kiya hai, jise aapko zaroor dekhna chahiye.
Picha nahin chhodti ye bimari. Zindagi mein koi aur umar bhar aapka saath nibhaye, ya na nibhaye, lekin agar diabetes ne ek baar aapka daaman thaam liya toh phir ye zindagi bhar aapka picha nahin chhodega. Ek baar aap diabetes ki grip mein aaye, toh phir poori umr dawaon aur doctoron ki sangati mein hi beetegi.
Diabetes ki case study:
Noida ki rehne wali Anupama Arya ko 15 saal pehle diabetes ka pata chala tha, aur tab se hi wo is bimari ke saath ji rahi hai. Dawaon ka dabba aur tarah tarah ke tests unki zindagi ka hissa ban chuke hain. Is bimari ne Anupama ko badal kar rakh diya, unhe manpasand phal, mithaiyan chhodni padi.
Halanki badli hui lifestyle aur dawaon ki wajah se wo is bimari ko control karne mein kaafi kamyaab rahi hain, lekin dar toh lagta hi rehta hai, aur ye diabetes ka hi dar hai ki wo aaj bhi bahar khane se darti hai.
53 saal ki Indu Agarwal bhi pichle 10 saalon se diabetes ki mareez hain. Allopathic dawaon se faayda nahi mila toh ab ayurvedic dawaon se wo is bimari ko kaabu karne ki koshish mein juti hain, lekin aaj bhi jab sugar test ke natije upar neeche hote hain, toh uski anupat mein chehre par chinta ki lakire bhi ubhar aati hain.
Types of Diabetes:
Type 1 diabetes, ye wo bimari hai, jo aapko genetic tareeke se transfer ho sakti hai, yaani agar aapke ghar mein kisi ko diabetes hai, toh aapke bhi is bimari ki chapet mein aane ka khatra badh jata hai.
Type 2. Ye mukhya roop se lifestyle disease hai. Shareerik mehnat na karna ya bahut kam karna, khanpaan par niyantran na rakhna, achhi neend na lena aur badhta tanav Type 2 diabetes ke mukhya karan hain.
Sehat ka rakhe khayal:
Survey ke anusar aaj desh mein 13 crore se zyada log pre-diabetic hain. Aur doctors ke anusar har saal takriban ek tihaai pre-diabetic log diabetes ke mareez mein badal jaate hain. Halanki agar khanpaan aur lifestyle mein sudhaar kiya jaye toh ye ankda hi nahi, aap apni sehat bhi sudhaar sakte hain.
Study mein hua bada khulaasa:
Agar aap bimari ke shuruaati daur mein hain toh kuch doctors ka dawa hai ki aap poore tarah diabetes mukt bhi ho sakte hain. Haal hi mein Bharat mein ki gayi ek research mein 18 se 60 saal ke aise 60 logon ko khane se aadha ghanta pehle 20 gram badam, yaani lagbhag 17-18 badam khane ke liye diye.
Breakfast, lunch aur dinner se aadha ghanta pehle unhe badam khilaye gaye. Unki diet ko control kiya gaya aur 45 minute tak rozana sair karne ke liye kaha gaya. Aisa karib teen mahine tak kiya gaya. Teen mahine baad inme se 33% logon ke blood sugar level normal aa chuke the, yaani unke upar se diabetes ka khatra tal chuka tha.
Regards,
Team “Sarkarikhabrein“