“Gadar-Ek Prem Katha” 22 saal ke baad film dobaara jab cinema hall mein kal release hui hai, toh is film ko dekhkar darshak khoob utsahit nazar aaye.
Actor Sunny Deol ke ek-ek dialogue par log khoob seatiyaan baja rahe hain. Mumbai mein kal Shukravaar ki raat film ki screening ke dauran Sunny Deol, Ameesha Patel, nirdeshak Anil Sharma aur gaayak Udit Narayan ki maujoodgi ne screening ko khaas bana diya. Sunny Deol ne jaise hi ‘Hamara Hindustan zindabaad tha, zindabaad hai aur zindabaad rahega’ dialogue bola, poora theater taliyon ki gadgadaahat se goonj utha.
Toh wahi, Udit Narayan ke gaaye geet ‘Main Nikla Gaddi Leke’ sunkar log jhoomne lage. Is dauran film ke nirdeshak Anil Sharma ne shooting ke dauran ka ek kissa share karte hue kaha ki ek baar film ki shooting ke dauran chaar lakh logon ki bheed ikatthi ho gayi, jiski wajah se film ki shooting rok deni padi thi.
Actor Sunny Deol, Ameesha Patel aur film ke nirdeshak Anil Sharma kal film ko promote karne ke liye kai shehron mein gaye the. Sunny Deol ne kaha, ‘Mujhe nahi pata tha ki log phir se dekhne film aayenge, main andar se bahut gabhra raha tha. Gabrahat is baat ki ho rahi thi ki hum log film ki release ko lekar itne shor macha rahe hai, pata nahi log film dekhne aayenge ki nahi.
Logon ka bahut pyaar hai, mujhe lagta hai ki ‘Gadar’ logon ke dilon mein aisi baithi hui hai ki ise log baar-baar dekhna pasand karte hain. Pehle jab Gadar release hui thi, toh hamein nahi pata tha ki yeh film Gadar macha degi. Industry mein toh log yahi kehte the ki yeh toh Punjabi film hai, ise Hindi mein dub karke release kar do, bahut saare distributors film kharidne tak ko tayyar nahi the.
Lekin jab film release hui aur janta ko itni pasand aayi ki sabke muh band ho gaye. Aaj bhi jis tarah se log is film pasand rahe hain, usse hamein iska part 2 banana ki himmat hui. Humne bhi koshish ki hai ki ‘Gadar 2′ kisi ko nirash na kare.’
Film ‘Gadar – Ek Prem Katha’ 22 saal pahle 15 June 2001 ko release hui thi. 22 saal ke baad 15 June ko film release na karke ek hafte pahle hi release kar di gayi. Nirdeshak Anil Sharma ne kaha ki 9 June ko Ameesha Patel ka janamdin hota hai.
Ishliye humne film ki release date 9 June ko chuni. Ameesha Patel ne kaha, “Isse bada mere janamdin ka khaas tohfa aur kya ho sakta hai? ‘Gadar’ ne meri zindagi badal di thi. Main maanti hoon ki meri pehli film ‘Kaho Naa Pyaar Hai’ logo ke dilon ko chu gayi thi, lekin jab ‘Gadar’ release hui toh logo ne mere kaam ko gambhirata se lena shuru kar diya.
Is film ke jariye ek abhinetri ke roop mein khud ko sabit karne ka mauka mila. Yah film na sirf Bharat mein balki is film ko Pakistan mein bhi khoob pasand kiya gaya tha. Film ko dekhkar wahan ki kuch buzurg mahilao ke phone aate the, aur woh kehti thi ki aapne hum Pakistaniyon ko itna rulaya hai ki humne apni potiyon ka naam Sakeena rakh diya hai.”
Nirdeshak Anil Sharma ne kaha, “Ek nirdeshak ke roop mein jo bhi film banata hoon, yeh sochkar banata hoon ki yeh Bharat ki nahi, balki vishv ki blockbuster film hogi. Kayi baar hamari soch sahi ho jati hai, kayi baar nahi hoti hai. ‘Gadar’ ke samay sahi ho gayi thi.”
Gadar-Ek Prem Katha: Shooting ke dauran aise ikattha hui 4 lakh ki bheed, nirdeshak ka khulaasa
Gadar ki shooting ke dauran ka ek kissa share karte hue Anil Sharma ne kaha, “Ek baar Amritsar mein shooting ke dauran 4 lakh se jyada log jama ho gaye. Aur, mujhe shooting band kar deni padi. Sunny shooting ke liye jaise hi hotel se nikle the, maine unko phone karke mana kar diya ki ab Amritsar mein shooting nahi ho payegi, hum log Amritsar ka sequence Mumbai Film City mein create karke karenge.”
Darasal, Amritsar mein train wale sequence ki shooting ke liye bahut sare crowd ki zaroorat thi aur shooting se ek din pehle production wale ne Amritsar mein announcement kar diya ki jisko shooting mein bhag lena ho woh kurta-pajama pehenkar aa jaye. Bataya jata hai ki us din Amritsar mein khoob kurte-pajame bikee aur shooting ke din chaar lakh logon ki bheed ikatthi ho gayi.
Itni bheed dekhkar nirdeshak Anil Sharma ko us din shooting cancel karni padi, toh gusse wale logon ne train par pathrav tak kar diye the aur us din Amritsar se ek bhi gaadi nahi nikal pai thi. Anil Sharma ne kaha, “Jab humne doosre din shooting ki toh ek baar khaas taur par anubhav kiya ki agar sarkar soch le ki shooting karani hai, toh kabhi koi dikat nahi hogi. Doosre din humne aisi shooting ki ki jaise film city mein shooting kar rahe ho.”
Regards,
Team “Sarkarikhabrein“