NMML society ka naam badalkar Pradhanmantri Sangrahalay aur Pustakalay Society karne par ne Congress ne teekhi pratikriya vyakt ki.
Nehru Memorial Museum and Library (NMML) se Bharat ke pehle Pradhanmantri Jawaharlal Nehru ka naam hatane par BJP aur Congress ke beech taja vivad shuru ho gaya hai. Dusri taraf september tak teen Moorti Bhavan Parisar ke andar “Loktantra ki Janani” gallery aur PM Narendra Modi ke jeevan, shasan aur uplabdhiyon par kendrit ek gallery banane ki taiyari ki ja rahi hai.
Pradhanmantri Sangrahalay swatantrata ke baad se Bharat ke sabhi 14 purv Pradhan mantriyon ko samarpit ek museum hai.
Teen Moorti Bhavan Parisar Pandit Jawaharlal Nehru ka adhikarik nivaas tha. Ismein ve 16 saal tak rahe the. Unke nidhan ke baad unke samman mein is aavaas ko Nehru Memorial Museum and Library mein parivartit kar diya gaya tha.
Pichle saal 14 April ko Ambedkar Jayanti par PM Narendra Modi ne isi parisar mein Pradhanmantri Sangrahalay ka uddghatan kiya tha. Ismein desh ke sabhi purv Pradhanmantriyon ki jeevan gaathaen hain. Is sangrahalay ko lekar BJP ne hamesha is baat par jor diya hai ki yeh saanskritik sthal ka loktantri karan hai.
Ismein desh ke pratyek Pradhanmantri ko woh sthan mil raha hai jiske ve hakdaar hain.
Is maamle ke jankaron ke anusar, teen nayi galleries – Orientation, Loktantra ki Janani aur ek anya vishesh roop se PM Modi par kendrit gallery – agle teen mahinon mein taiyar hone ki sambhavna hai.
Orientation gallery ane walon ko kuch hi minutes mein poore sangrahalay ki ek jhalak dikhayegi. Loktantra ki Janani gallery mein yeh dikhaya jayega ki pichle 75 varshon mein Bharat ne loktantra ke roop mein kaise pragati ki.
PM Modi ki gallery mein unke jeevan aur prerna, pradhanmantri ke roop mein unke vyaktitva, unki shasan shaili, kootneeti aur neeti nirman, unke vyaktitva ke anya pahluon ke saath-saath unki maa ke saath unke sambandh, paryavaran par unke vichaar, aadi ko pradarshit kiye jaane ki sambhavana hai.
Sangrahalay mein yeh bhi pradarshit kiya jayega ki Bharat khel, kala, shiksha, arthvyavastha jaise kshetron mein kaise age badha hai. Is mamle ki jankari rakhne wale ek adhikari ne kaha, “Yah vibhinn pradhanmantriyon ko jodne vale ramp par pradarshit kiya jayega. Ab tak har din kam se kam 3,000 log aa rahe hain.”
Sarkar ki or se NMML Society ka naam badalkar Pradhanmantri Sangrahalay aur Pustakalay Society karne par ne Congress ne teekhi pratikriya vyakt ki hai.
Congress ne ise “nimnstariya karya” kaha aur kaha ki in imaraton ka naam badalne se virasat nahi mitati. Is par BJP adhyaksh JP Nadda ne yah kehte hue palatwar kiya ki Congress yah svikar karne mein asamarth hai ki neta “ek vansh” se pare bhi hain.
Unhone kaha ki yah “rajanitik apach” ka ek umda udaharan hai. Sangrahalay ka naam badlne ka faisla thursday ko NMML Society ki ek vishesh baithak mein liya gaya. Baithak ki adhyaksha Raksha Mantri Rajnath Singh ne ki, jo ki is society ke upadhyaksha hain.
NMML ko lekar BJP aur Congress ke beech kayi vivad hue hain. Chahe Jairam Ramesh, Kharge jaise Congress netaon aur Nitin Desai aur Nayanjyoti Lahiri jaise buddhijiviyon ko sangrahalay ki society se bahar karna ho, ya Sangh parivar ke netaon Deendayal Upadhyay, Shyama Prasad Mukherjee ya Hindutva vicharak Veer Savarkar par seminar shuru karna ho, in muddon ko lekar vivad hote rahe hain.
Congress neta Jayaram Ramesh ne friday ko sangrahalay ka naam badalne ke kadam ki ninda karte hue kaha ki NMML ek global intellectual landmark aur pustakon aur abhilekhon ka khazana hai. Congress adhyaksh Mallikarjun Kharge ne kaha ki jinka apna itihaas nahin hai, ve doosron ke itihaas ko mitane ki koshish kar rahe hain.
Haalanki, purv PM Chandra Shekhar ke bete Neeraj Shekhar, jo ki ek BJP sansad bhi hain, ne naam badalne ka swagat karte hue kaha ki yah un sabhi pradhanmantriyon ke liye upyukt shraddhanjali hai jinhone desh ki seva ki. Unhone kaha ki, Congress kabhi bhi vanshwad se pare nahi dekhti hai.
Pehle keval Nehru ko samarpit rahe is sangrahalay mein ab tak kul 43 galleries hain.
Yeh galleries swatantrata sangram, Bharat ke samvidhan ka nirman, 1947 mein Bharat, saksharta, arthavyavastha, British virasat adi par kendrit hain. Sabhi 14 purv pradhanmantriyon ki uplabdhiyon ko alag-alag rekhankit kiya gaya hai. Sound and light show ke saath 6 videshi bhashaon mein audio guide hai ismein Bharat ki doorsanchaar aur vaccination mein safalta ki kahaniyan bhi sunayi jati hain.
Pradhanmantri Modi ne pichle saal sangrahalay ka uddghatan karte hue kaha tha ki aane wale varshon mein yah yuvao ko yah samajhne mein madad karega ki pratyek PM ne kin kathinaiyon ka samna kiya aur unhone unhe kaise door kiya. Uddghatan ke samay purv PM Lal Bahadur Shastri, Morarji Desai, Chaudhary Charan Singh, Chandrashekhar, Deve Gowda, PV Narasimha Rao aur Atal Bihari Vajpayee ke parivaar ke sadasya maujood the.
Regards,
Team “Sarkarikhabrein“